Jisk’a lalana qalampi qinayaru jaktiri – Niño que arroja piedra a las nubes

Jisk’alalaw, mä uruxa, jalaskäna,

qullusa qullupa, pampasa pampapa, arust’asa.

Wayñunaka jayllasisa.

Uñatasisa, uñatasisa, taqi tuqiru.

Jamach’inaka, pilpintunaka, arknaqasa.

Akatajamata laqampuxa qinayt’atjatäna,

uru ch’amakt’atayasa

Jisk’alalasti walpuni mulljasitayna.

Jisk’a lup’iwipanxa amuyt’atanawa

Qinayaru jaqurpayaña qalanakampi jaqt’asa.

Mä chhijllata qala aptasinsti

mayaqi qinayaru taqi ch’amapampi jakt’atäna.

Ukjarusti mayaki llijullijuxa qhant’atayna.

Q’ijuq’ijusti qhunantarakitaynawa.

Jisk’alalasti, wali sustxata, mayaki jalawayxatayna

Kayusa kayupa, ch’amasa ch’amapana.

Utapa chiqaru t’ijtatäna

Mamapana jarphiparu

Phullu manqharu imantasisa.

Kamachisa, kunatsa mulljasta,

mamapaxa sawayatayna.

Jisk’alalasti, jacht’asisa,

akhama arsutana:

Mamita, mamita, imantxita, imantxita

Qinayaruwa qalampi jakt’awäyta,

Qinayasti q’ijuq’ijumpiwa jakt’anitu.